ప్రశ్న: సిల్కు దారాలను ఎలా తయారు చేస్తారు?
-కె. ఐశ్వర్య, 6వ తరగతి, మూలపేట (నెల్లూరు)
జవాబు: సిల్కు దారం పట్టుపురుగులనే చిన్న కీటకాల నుంచి లభిస్తుంది. వీటిలో ఆడపురుగు మల్బరీ చెట్టు ఆకులపై ఏటా రమారమి 500 గుడ్లు పెడుతుంది. పది రోజుల తర్వాత ఆ గుడ్ల నుంచి లార్వాలు బయటకు వస్తాయి. ఈ లార్వాలు మల్బరీ ఆకులను తింటూ పెరుగుతాయి. ఇవి పెద్దవగానే వాటి నోటి లోంచి జిగటగా ఉండే ఒక ద్రవం వెలువడుతుంది. ఆ ద్రవంతో పట్టుపురుగు తన చుట్టూ ఒక గూడు కట్టుకుంటుంది. దీన్ని కకూన్‌ (cocoon) అంటారు. పట్టుపురుగు పరిమాణం పెరిగే కొద్దీ ఈ గూడు పరిమాణం కూడా పెరుగుతుంది. ఈ కకూన్ల నుంచే పట్టుదారాన్ని వెలికి తీస్తారు. అందుకనే పట్టుపురుగులను ప్రత్యేకంగా మల్బరీ చెట్లపై పెంచుతారు. పెద్దవయిన కకూన్లను సేకరించి వేడి నీళ్లలో ఉడికిస్తారు. తర్వాత వాటి నుంచి పట్టు దారాన్ని తీస్తారు. ఒక కకూన్‌ నుంచి 500 నుంచి 1300 మీటర్ల పొడవుగల పట్టుదారం లభిస్తుంది. ఈ దారం సన్నగా ఉన్నా, అదే మందం గల స్టీలు తీగంత బలంగా ఉంటుంది. ఈ దారాల పోగులతోనే పట్టు వస్త్రాలను నేస్తారు.
-ప్రొ||ఈ.వి. సుబ్బారావు, హైదరాబాద్‌
- ===========================
No comments:
Post a Comment
your comment is important to improve this blog...