ఏదైనా ఒక విషయం గురించి తెలుసుకోవాలన్న కుతూహలం ప్రతి ఒక్కరికి ఉంటుంది. చిన్నపిల్లలైతే మరీఅత్యుసాహము కనబరుస్తారు. చిన్న విషయమైనా, అతి సాధారణ విషయమైనా లోపల ఇమిడి ఉన్న రహస్యము ఎంతోమందికి తెలియక పోవచ్చును... అలా తెలుసుకోవాలనే ప్రయత్నమే ఈ సేకరణ. ఇందులోని విషయాలు కొత్తవేమీ కావు, అందరికి తెలిసినవే. మరొకసారి నెమరువేసుకుందాం !...
ప్రశ్న: మెరుపుల్ని చూస్తే కళ్లు పోతాయా?
జవాబు: మెరుపులు వర్షాకాలంలో మేఘాలలో కలిగే విద్యుదుత్సర్గాలు (electrical discharges). మెరుపులు వెడలే ప్రాంతంలో ఉష్ణోగ్రత సూర్యోపరితల ఉష్ణోగ్రతకన్నా చాలా రెట్లు ఎక్కువగా ఉంటుంది. కాంతి తీవ్రత (intensity) కూడా ఆ ప్రాంతంలో చాలానే ఉంటుంది. న్యూటన్ సూత్రాల ప్రకారం కాంతి తీవ్రత, ధ్వని తీవ్రత దూరం పోయేకొలదీ గణనీయంగా తగ్గుతాయి. మెరుపు కాంతి మేఘాల దగ్గర తీవ్రంగానే ఉన్నా అక్కడి నుంచి మనల్ని చేరేసరికల్లా బాగా తగ్గిపోతుంది. పైగా మెరుపు ఉండేది క్షణికమే. అది కంటిని ప్రభావితం చేసేలోపే మాయమవుతుంది. కాబట్టి మెరుపుల్ని చూడటం వల్ల కళ్లు పోతాయనడంలో నిజం లేదు. కానీ ఒక్కోసారి విపత్కర స్థితుల్లో తీవ్రతరమైన మెరుపులు వస్తాయి. పనికట్టుకుని వాటిని చూసి ఇబ్బందులు కొని తెచ్చుకోవద్దు. సూర్య కాంతి ప్రమాదకరం. దాన్ని తదేకంగా చూస్తే దృష్టిలోపాలు వస్తాయి.
- ప్రొ|| ఎ. రామచంద్రయ్య, నిట్,-వరంగల్; రాష్ట్రకమిటీ, జనవిజ్ఞానవేదిక
- =================
